Shemsi Elshani tash e sa kohë kishte pasur probleme shëndetësore që i vinin si pasojë e funksionit të reduktuar të zemrës.

Ai gjatë gjithë kohës kishte ndjerë lodhje dhe plogështi të shoqëruara me probleme të frymëmarrjes.

“Para operimit ndjeja shumë plogështi dhe probleme me frymëmarrje, më pas pata një sulm dhe pa vetëdije më kanë dërguar fillimisht në QKUK, më pas kam ardhur në Spitalin Amerikan. Tani pas intervenimit po ndihem shumë mirë dhe shumë më i fortë”, tha pacienti i cili para një ore kishte përfunduar intervenimin.

Aparati për resinkronizim të zemrës (cardiac resyncronisation therapy – CRT-D) është një pajisje që përdoret për trajtimin e pacientëve me zemër të zgjeruar dhe me funksion të reduktuar përkatësisht te pacienteve me kardiomiopati të dilatuar.

Një grup i pacientëve me kardiomiopati të dilatuar të cilët edhe në EKG kanë një ndryshim që quhet bllok i degës së majtë (LBBB) mund të themi se janë më me fat se ata që nuk e kanë ketë ndryshim në EKG. Për ketë grup të pacientëve dihet se vendosja e një lloji Pacemakeri që është me 3 elektroda që vendosen në 3 dhomëza të zemrës, dihet se ndihmon shumë në zvogëlimin e përmasave të zemrës dhe rritjes së fuqisë apo funksionit sistolik të zemrës. Kjo procedurë quhet Terapia e Resinkronizimit të Zemrës apo (cardiac resyncronisation therapy – CRT-D).

Po ashtu dihet që pacientët me kardiomiopati të dilatuar, përkatësisht pacientët me zemër të zgjeruar kanë tendencë për zhvillim të aritmive me natyrë të keqe që mund të përfundojnë me fatalitet. Pajisja qe vendoset për CRT-D e ka edhe funksionin e detektimit dhe trajtimit të këtyre aritmive me elektroshok menjëherë.

Ekipi i kardiologëve që realizuan këtë intervenim janë Dr. Sandro Brusich – Kardiolog nga Kroacia si dhe Dr.Edis Demiri – Kardiolog në Spitalin Amerikan.

Dr. Edis Demiri tha se gjithë procedura ka shkuar shumë mirë, tashmë pacienti është në gjendje shumë të mirë shëndetësore.

“E gjithë procedura e intervenimit ka shkuar shumë mirë, pacienti tashmë është në gjendje shumë të mirë shëndetësore, tash e tutje ai nuk do të ketë më asnjëherë probleme të cilat veçse i kishte para intervenimit”, thotë Dr.Edis Demiri.

Dr.Edis Demiri tha se ky intervenim ishte i pari që u realizua në Kosovë dhe tash e tutje ekipi i kardiologëve të Spitalit Amerikan do të vazhdojë me aplikimin e këtij intervenimi.

Ndërsa Dr.Sandro Brusich nga Kroacia tha se ishte një përvojë e mrekullueshme bashkëpunimi i tij me mjekët nga Spitali Amerikan.

“Intervenimi kaloj me sukses falë bashkëpunimit dhe punës së palodhshme të mjekëve nga Spitali Amerikan. Shpresojmë për bashkëpunime të tjera edhe në të ardhmen, për mua ishte një përvojë shumë e mirë”tha Dr. Bruschi, Kardiolog nga Kroacia.

Intervenimi zgjati rreth tre orë dhe pacienti pritet që ditën e nesërme ta lëshoj spitalin për të vazhduar jetën e tij normale.[:]